كلام كل أب و أم مصرى

أشهر جمل بيقولوها الأب و الأم في مصر

* ابوك دايما كان بيطلع الاول على الفصل .

* والله ما انت فالح .. وادي دقني أهه .

* هو طول النهار قدام الزفت الكمبيوتر مش ممكن كده .

* ما تلزقش في التلفزيون كده .. نظرك هيضيع .

* يا ابني محدش هينفعك .

* قصة الغريق الكاذب اللي كل مره يقول الحقوني ... لحد ما غرق بجد .

* ربنا يرزقك بعيل يوريك اللي ورتهوني .

* امشى جاتك مشش فى ركبك.

* ما تطلعش على الملايه النظيفه و رجليك متوسخه كده .

*أوعى حد يضحك عليك ويقولك جرب السيجارة دي.

* ايه الا مبالاه و الاستهتار اللي انت عايش فيهم دول .

* قوم اقرا لك كلمتين ينفعوك .

* وطي المدعوق ده شويه .

* انت فاكرنا نايمين على ودانا ؟

* ما تلبسش القميص على اللحم زي العيال الصايعه .

* بلاش أكل بره .

*ياريتك تحفظ دروسك زى مانت حافظ الاغانى.

* عيـــب ... لازم تحترم اللي أكبر منك .

* لو شفت خناقه ما لكش دعوة بيها .

* لازم تأكل سلطه .

* اوعى تكدب عليا كده تاني مرره .

* اوعى حد غريب يديلك حاجه تاكلها و تشربها و تاخدها منه .

* يا ابني حرام عليك الى بتعمله فينا ده.

* بلاش لعب في الشارع .

* ما تعليش صوتك .

* وانت فاكر احنا مستنيين منك حاجه .

* المسلسل مش هينفعك ...قوم .

* ما تقعدش قدام المروحه وانت مستحمي .

* كفايه رغي في التليفونات .

* بلاش وقفة الشبابيك و البلكونات .

* كل على مهلك .. وامضغ كويس ... وما تكلش وانت واقف .. وكل من قدامك ما تحفش .

* اطفي التلفزيون وقوم ذاكر . أو اطفي التلفزيون و خش اوضتك .

* ربنا يهديك ربنا يهديك ... وأحيانا .. انك لا تهدي من أحببت .

* ما تمشيش حافي في السقعة دي .

* ما فيش مذاكرة على المزيكا وازاى.. بتذاكر و البتاع ده شغال جنبك .

* افرد ظهرك .

* ماتكلش فى ضوفرك.

* كنت فين لحد دلوقتى يا صايع.

* انا مش عارف انته طالع لمين.

* ما تتأخرش بعد المدرسه و تقعد تصيع مع أصحابك .

* بص كويس و انت بتعدي الشارع .

* ومالها الكتب بتاعة الوزاره ؟

* اللي بيشيل قربه مخرومة بتخر عليه لوحده ..

* لو مش فاهم حاجه ارفع ايدك و قول للأستاذ مش فاهم .. متتكسفش .

* يأبنى المذاكره مابتخلص .... نفسى اشوفك مره ماسك كتاب .

* ما تردش عليا .

* مش عايز اسمع صوت .

* مالكش دعوة بالسياسة .. وماتمشيش في مظاهرات .

* التهديدات المخيفة شكلا و الكارتونية مضمونا : مثل: هأقطم رقبتك أو هأقطع ايدك أو هأقطع لك لسانك أو هأدبحك دبح .

* و أخيرا ::
ضرب امثلة تشجع على الكفاح و أشهرها أحد الأقارب اللي كان بيذاكر على لمبة جاز أو على عامود النور الي في الشارع و نجح وخد الدكتوراه وسافر أمريكا .

عدد الرسائل : 55 تاريخ التسجيل : 06/12/2007

كلام كل أب و أم مصرى Thankyouangelwhiteqb1

...بجد موضوع جميل جداً بس الاجمل من الموضوع هو انت...

عدد الرسائل : 2 تاريخ التسجيل : 21/12/2007

ولسة في كلام كتير اوي زي:

1) وانت بتعدي الطريق بص شمال ويمين.
2) ماتصحبش ابن الجيران علشان امة كذا وكذا...
3) لما تخش الفصل اقعد في الدسك الاول
4) خلي بالك من شنطتك كويس اصل في عيال تسرق الكحل من العين
5) زمان كانت العيال لما تشوف ابوها ترتعش من الخوف مش زي جيل اليومين دول
6) في ام بخيلة تقول لولادها لما تآكل السندوتش بتاعك اوعي تدي لحد حاجة

بجد الموضوع بتاعك تحفة